Girjeárvvoštallanskovvi ohppiide

Dán skovi galget oahppit ieža deavdit, muhto oahpaheaddji galgá veahkehit ohppiid dárbbu mielde. Skovvi heive buot ahkahaš ohppiide, muhto dieđusge soitet nuorat oahppit dárbbašit eanet veahki deavdimiin go boarráset oahppit.  

Oahppit váldet skovi fárrui go dii vuolgibehtet girjerádjosii. De lea álki oaidnit makkár beroštumit oahppis leat ja makkár girjjiid oahppi lea ovdal lohkan. Dáinna sáhttá oahpaheaddji kártet makkár lohkandásis oahppi lea ja makkár šáŋŋergirjjiide oahppi liiko dahje ii liiko. Nu sáhttá álkibut gávdnat girjji maid fállá oahppái.  

Image

Dá leat moadde rávvaga movt dáinna skoviin sáhttá bargat:

• Sáhtát addit leaksun. De galget oahppit deavdit vuosttaš dieđuid dakkár girjji birra maid leat ruovttus aitto lohkan.  
• Sáhtát addit dihto girjji lohkanleaksun ja go leat lohkan girjji, de sáhttet oahppit deavdit skovi ruovttus dahje skuvllas.  
• Sáhtát ovdal girjerájusguossástallama muitalit girjerájusbargái makkár girjeberoštumit du ohppiin leat, vai girjerájusbargi beassá ovdagihtii jurddašit makkár girjjiid galgá fállat du ohppiide.  
• Ráhkat áinnas alccesat maid dakkár skovi, vai oahppit besset oaidnit movt dán deavdá, ja vai čalmmustahtat ohppiide ahte rávisolbmot maid lohket girjjiid. Muitte, don leat lohkanovdagovvan ohppiide!  

Govva: Gunnlaug Ballovarre