Dotkeme joe lea guhkiem tjuvtjedamme ahte, gosse unnebelåhkoegïelem lohkehtehtedh dellie joekehth ööhpehtimmievuekieh aaj joekehth illeldahkh vedtieh. Dennie dotkemebarkosne aaj lea goerehtamme magkerh vuekieh dam bööremes gïelemaahtoem buakta, jïh mij lea jïenebe radtjoes vuekien unnebelåhkoegïelem ööhpehtidh. Ovmese lehkien veartenen mietie lea goerehtamme, jïh desnie lea muvhth vuekieh gaavneme maa guktie gåarede hïjvenlaakan gïele-leerehtimmine lyhkesidh.
Saemiedigkie lea reektehtsem bæjhkoehtamme, Faamohks gïelemodellh (2022,) mij buerkeste guktie faamohks gïelemodellh leah veele saemien tsiehkide sjïehtedamme. Reektehtsen vualkoesijjie lea ahte, daan beajjetje gïelelïerehtimmievuekine gellie maanah eah produktijve gïeleguedtijine sjïdth. Fåantoe daase lea, ihke jienebh maanagïerth jïh skuvlh leah gååjhkedimmiemodellen mietie barkeminie, jïh dïhte hov lea viesjies gïelemodelle. Dan bijre åadtjoeh vielie vuelielisnie lohkedh.
Paahken sïsvege
Daennie paahkesne åadtjoeh jienebe lohkedh dej golme gïelemodelli bïjre mah Saepmesne provhkijibie: gååjhkedimmiemodelle, vejtiestimmiemodelle jïh nænnoestimmiemodelle. Paahkesne lea sjïere boelhketjh gusnie gïelemodelli faagevåaromidie gïetskebe buerkiestamme. Jïh mïnngemes åadtjoejidie barkedh aelhkies kaarhtedimmiem tjirrehtidh gusnie goerehtidie mij gïelemodelli mietie lidie daan raajan barkeme.
Gaaltijh:
Pasanen, Annika, Baal, Berit Anne Bals, Mikkelsen, Inga Lill, Päiviö, Ánne-Marge (2022): Sterke språkmodeller, Sametinget. https://sametinget.no/aktuelt/rapport-om-sterke-sprakmodeller.21386.aspx
Guvvie: Árvu