Dat movt unnitlogu giella oahpahuvvo addá iešguđetge bohtosiid, nu boahtá ovdan dutkamušain mat leat dáhkon. Lea maiddai dutkojuvvon maid sáhttá bargat vai mánát ja nuorat ožžot njuovžilis vugiin buori giellamáhtu unnitlogugielas. Daid dutkamušaid leat čađahan miehta máilmmi ja daid bokte leat ráhkadan buriid modeallaid mat nevvot movt čađahit giellaoahpahusa buoremus lágii mielde.
Sámediggi lea álmmuhan Gievrras giellamodeallat (2022) raporta mii čilge movt gievrras giellamodeallat leat heivehuvvon sámi kontekstii. Otná oahpahusvuogádagain leat nu oallugat geat eai šatta produktiiva sámegielagat. Dát boahtá das go nu olu mánáidgárddit ja skuvllat čuvvot goaikkanasmodealla, mii lea geahnohis giellaoahpahusmodealla. Daid birra beasát eanet lohkat dás vuollelis.
Páhka sisdoallu
Dán páhkas beasat eanet lohkat dan golmma giellaoahpahusmodealla birra mat geavahuvvojit sámis: goaikkanasmodealla, oamastanmodealla ja nannenmodealla. Dán páhkas leat maid sierra oasážat gos beasat lohkat giellaoahpahusmodeallaid fágalaš vuođu birra, ja manin mii dárbbašit daid modeallaid. Loahpas oažžubehtet bargun čađahit álkes kártema gos iskabehtet makkár oahpahusmodeallaid dii dál čuovvubehtet.
Guldal áinnas PodCasta Oahppu ii deatte: Giellamodealla
Gáldu:
Pasanen, Annika, Baal, Berit Anne Bals, Mikkelsen, Inga Lill, Päiviö, Ánne-Marge (2022): Sterke språkmodeller, Sametinget. https://sametinget.no/aktuelt/rapport-om-sterke-sprakmodeller.21386.aspx
Govva: Árvu