Maid berre oahpaheaddji bargat ovdalgo vuolgá girjerádjosii
- Kártet oahppi beroštumiid
Ovdamearkka dihte sáhtát ráhkadit ságastallankoarttaid maid bokte kártet ohppiid beroštumiid.
- Ohppiid lohkandási vuhtiiváldit
Oahpaheaddji berre ovdagihtii jurddašit makkár lohkandásis oahppi lea, vai ii fála beare váttis dahje beare álkes girjjiid oahppái. De berre iskat makkár fonttat girjjis leat, makkár giella das lea, leago das olu vai unnán teaksta ja leatgo das olu govat. Jus ii leat nu hárjánan lohkki, de berre válljet girjji mas lea geahppa giella, álkes fonttat ja olu govat. Nanu lohkkiide sáhttá fállat girjjiid main leat unnán govat dahje main eai leat govat, ja main lea eanet teaksta.
- Ráhkadit ulbmila go lea girjerádjosii vuolgimiin
Ulbmil sáhttá leat háhkat dieđuid dihto fáttá birra, válljet girjji maid lohká go lea lohkankvárta dahje lohkanleaksun, vuolgit guldalit girjeovdanbuktima dahje oahpásnuvvat girjerádjosii.
- Hupmat movt láhtte girjerádjosis
Ráhkat njuolggadusaid mat bidjet čielga rámmaid din girjerájusguossástallamii. Ovdamearkka dihte ahte doppe dii ehpet geahča telefovnnaid, dii ehpet viegat ja rigere ja ahte dii muđui láhttebehtet olmmošlaččat. Sáhtát maid bidjat gáibádussan ahte oahppit válljejit unnimusat ovtta lohkamuša maid luoikkahit, dahje ahte oahppit galget veahkkin skuvlaoappáide ja skuvlavieljaide gávdnat girjjiid.
- Hupmat man galle girjji luoikkahit
Muhtomin sáhttá hui miella luoikkahit máŋga girjji, muhto de ii soaitte nu somá jus ii hahppet lohkat visot girjjiid luoikkahanáigodagas. Danin sáhttá leat buorre jus oahpaheaddji lea ovdagihtii bidjan meari ahte galgá luoikkahit unnimusat ovtta lohkamuša ja eanemusat guokte.
- Ii dárbbaš luoikkahit girjji
Eai buot oahppit soaitte háliidit luoikkahit girjji dahje gávdnat dakkár girjji mas beroštit. Danin sáhttá ovdagihtii hupmat ahte jus háliida, de sáhttá maid luoikkahit ovdamearkka dihte govvaráiddu dahje muhtin bláđi mas berošta.
- Humadit girjerájusbargiin
Ovdagihtii humadit girjerájusbargiin vai son beassá ráhkkanit dassái go oahppit bohtet.