Giellabirrasa kárten
Eanas mánáidgárdebargit leat hárjanan áicat ja kártet mánáid giela ja giellageavaheami. Dakkár kártemiin dávjá lea ulbmil iskkat dárbbašitgo mánát liige čuovvoleami giellaovdáneami ektui. Go galgá kártet giellabirrasa ja gielladilii, de lea eará ulbmil ja eará masá galgá bidjat fuomášumi.
Erohus giellabirrasa ja máná giela kártemis
Go kárte máná giela, de bidjá fuomášumi dušše dan ovtta mánnái, su giellamáhttui ja giellageavaheapmái. Daid kártemiid boađus dávjá váikkuha dušše dan dihto máná. Go kárte giellabirrasa, de leat olu áššit maidda šaddá bidjat fuomášumi. Vuosttažettiin de leat olu olbmot geat váikkuhit giellabirrasa giellageavaheami, sihke rávisolbmot ja mánát. Dasto váikkuhit buot fysalaš bealit giellabirrasii. Earet eará makkár gillii leat teavsttat čállojuvvon ja makkár giella lea muđui oidnosis. Leago sámegielat dáidda, sámegielat šilttat, sámegielat alfabehta ja nu ain. Makkár duhkorasat, dávvirat ja ávdnasat leat oidnosis maiddai váikkuha giela. Duhkorasat sáhttet hástalit mánáid sámástit, dego skuhterat, gietkamat, giikanat, oaggunstávrrát ja sámi guovlluid eallit. Jus šiljus lea lávvu dahje árran, de dat maid sáhttá movttiidit sámástit. Buot mas lea čanastat Sápmái, sáhttá jorahit ságá sámegillii ja sámi bargguid ja doaimmaid birra. Go kárte giellabirrasa ja gielladilii, de lea ulbmilin gávnnahit guđe giella adno ja gullo eanemusat birrasis. Sihke mánáin, bargiin ja váhnemiin. Dakkár kárten čálmmustáhtte guđe giellamodealla din mánáidgárdi nákce fállat.
Boahtte oasis gávnnat kártenskovi man vuođul kártebehtet iežadet giellabirrasa ja -dili.