Otná mánát leat ihttábeaivvi giellaguoddit
Gievrras giellamodeallat leat bákkolaččat jus boahttevaš buolvvat galget oahppat sámegiela. Geahnohis giellamodealla (goaikkanasmodealla) bokte mánát eai oahpa doarvái bures sámegiela ahte hálddašišgohtet dan. Dušše gievrras giellamodeallaid bokte sáhttet mánát hálddašišgoahtit sámegiela, go de doaibmá sámegiella sihke gulahallan- ,oahpahus- ja bargogiellan. Dainna lágiin mánát ohppet sámástit aktiivvalaččat ja spontánalaččat. Dát lea áibbas dárbbašlaš vai mánát eai molsso giela humadettiin ja vai nákcet ealáskahttit sámegiela.
Gievrras giellamodeallat easttadit giellaattrišuvnna mánáin geain lea sámegiella eatnigiellan. Giellaattrišuvdna lea go eatnigielat máná giella ii ovdán nu movt lunddolaččat vurdojuvvo. Giellaattrišuvdna dáhpáhuvvá go eatnigielagiidda ii leat doarvái buorre giellafállu mánáidgárddiin ja skuvllain. Gievrras giellamodeallat addet bistevašvuođa giellaoahpahussii ja easttadit ahte mánát masset dan giellamáhtu mii sis juo lea (Sámediggi 2022:15.).
Gáldu:
Pasanen, Annika ja earát 2022: Gievrras giellamodeallat. Sámediggi