Nannenmodealla mánáidgárddis
Nannemodealla fállojuvvo mánáide geain lea sámegiella eatnigiellan. Go dán giellamodealla čuovvu, de lea mánáidgárddiin sámegiella gulahallangiellan ja bargogiellan. Dainna lágiin mánát ohppet eanet sámegielat sániid ja sámegielatmáhttu ovdána dássedit. Nannenmodealla lea hui dehálaš vai giella beassá lunddolaččat ovdánit riegádeami rájes gitta rávisolbmo ahkái.
| Máná dahje oahppi gielladuogáš | Giela sajiáldát skuvllas, luohkkálanjas dahje mánáidgárddis | Servvodatmihttu | Bistu | Giellapráksisat | Gielalaš boađus |
|---|---|---|---|---|---|
| Mánát geain lea sámegiella ruovttugiellan. | Sámegiella sihke oahpahus- ja gulahallangiellan. | Nanu sámegielat. | Gávdnogo ollislaš giellaplána mánáidgárddiin ja skuvllain? | Diđolaš giellageavaheapmi ja árvvoštallan giellageavaheamis. | Sihke čálalaš ja njálmmálaš produktiiva sámegielgeavaheapmi. |
Gáldu tabellii: Gievrras giellamodeallat raportta s.9
Go nannenmodealla galgá čuovvut, de galgá ásahit giellaplánaid ja dihtomielalaš giellageavaheami mánáidgárddiin. Nannenmodealla birra beasat eanet lohkat gievrras giellamodeallaid guđat, gávccát ja ovccát páhkain.
Gáldu: Pasanen, Annika & earát 2022: Gievrras giellamodeallat. Sámediggi.