Nannenmodealla
Nannemodealla fállojuvvo mánáide dahje ohppiide geain lea sámegiella eatnigiellan. Go dán giellaoahpahusmodealla čuovvu, de lea mánáidgárddiin sámegiella gulahallangiellan ja skuvllain lea sámegiella sihke gulahallan- ja oahpahusgiellan eanas fágain. Dainna lágiin mánát ohppet eanet sámegielat sániid ja sámegielatmáhttu ovdána dássedit. Nannenmodealla lea hui dehálaš vai giella beassá lunddolaččat ovdánit riegádeami rájes gitta rávisolbmo ahkái.
Go nannenmodealla galgá čuovvut, de lea dehálaš ásahit giellaplánaid ja dihtomielalaš giellapráksisiid mánáidgárddiin ja skuvllain.
Nannenmodealla birra beasat eanet lohkat gievrras giellamodeallaid guđat, gávccát ja ovccát páhkain.
Gáldu: Pasanen, Annika & earát 2022: Gievrras giellamodeallat. Sámediggi.