Álggahit barggu gievrras giellamodeallaiguin
Dát bargu ii sáhte biddjot ovttaskas mánáidgárdeoahpaheaddjái dahje bargái gii bargá sámi mánáiguin. Berre ásahuvvot prošeaktajoavku mii ovttas mánáidgárdeeaiggádiin pláne, čađaha ja čuovvola gievrras giellamodeallaid barggu. Joavkkus berre válljejuvvot okta dahje moadde olbmo geain lea ovddasvástádus jođihit digitála láidehuspáhkaid praktihkalaš čađaheami. Daid gávdnabehtet mánáidgárde-siidduin giellabalgat.no-neahttasiidduin.
Sii, geat leat stivrenjoavkkus dahje prošeaktajoavkkus, berrejit beassat bures oahpásmuvvat páhkaid sisdollui mat galget ovdanbuktojuvvot.
Čađahanplánas berrejit leat dáhtonat goas galgá bargat iešguđetge osiiguin bargiid oktasašáiggis. Lassin jeavddalaš oktasaš čoahkkimiidda berre maid várret áiggi ossodagaide/joavkkuide goas sáhttá plánet, digaštallat ja árvvoštallat movt ođđa bargovuogit doibmet ja dan vuođul heivehit ja ovdánahttit barggu.
Barggu sáhttá organiseret bistevaš joavkun mat ovttasbarget guhkit áigge. Daid sáhttá juohkit ossodagaid dahje bargojoavkkuid (teamaid) mielde.
Muitet várret áiggi ja vejolašvuođa ságastallat ovdánahttinbarggu birra. Sáhttet leat smávva ovdanbuktimat, humadeapmi gáfebeavddis dahje oanehis diehtojuohkinčoahkkimat. Dat berrejit leat rahpasat buot bargiide, vai buohkain lea oktasaš ipmárdus ovdánahttinbarggus ja gievrras giellamodeallaid dehálašvuođas.
Dá leat gažaldagat ja čuoggát maid vuođul sáhttibehtet ságastallat, ovdalgo álggahehpet barggu digitála gealbopáhkaiguin:
- Makkár mihtut leat mis gievrras giellamodeallabargguin?
- Geas galgá, lassin mánáidgárddi jođiheaddjái, leat ovddasvástádus gealboloktemii ja siskkáldas proseassaide?
- Man ollu áiggi sáhttit juolludit ovdánahttinbargui olles mánáidgárdejagis?
- Gii galgá ráhkadit áigeplána digitála gealbopáhkaid barggu várás?
- Movt leat don eaiggádin/jođiheaddjin ráhkkanan digaštallamiidda váttes ja hearkkes fáttáid birra? Omd. sámi identitehta, giela, dáruiduhttima, guottuid sámiide ja sámiid beroštumiide, ja eará guoskávaš fáttáid birra.
- Lea go dárbu gulahallat/gulaskuddat váhnemiiguin giellamodeallaid birra ovdal go gievrras giellamodeallabargu álggahuvvo?
- Dárbbašehpetgo liige resurssaid dán bargui?
- Leatgo dát resurssat fidnemis siskkáldasat?
- Berret go mii ohcat eará ruhtadeami?
- Berret go mii bivdit olgguldas bagadallama?
- Jus lehpet ovdal bargan gievrras giellamodeallaiguin, de sáhttibehtet válljet makkár sisdollui háliidehpet bidjat fuomášumi dán mánáidgárdejagi. Maid háliidehpet ovdánahttit?
Govva: Ørjan Marakatt Bertelsen