Dál leat guokte gievrras giellamodealla mat leat anus muhtin sámi mánáidgárddiin ja sámi ossodagain, ja maid berre ovddidit viidáseappot buot sámi mánáidgárddiide ja ossodagaide. Nubbi modealla leat nannenmodealla, mii buoremusat heive mánáide geain lea sámegiella ruovttugiellan ja gulahallangiellan. Nubbi modealla fas lea oamastanmodealla, mii heive mánáide geain lea dárogiella ruovttugiellan ja galget oahppat ja ovdánahttit sámegiela gulahallangiellan.
Gievrras giellamodeallaide lea dárbu, dan dihte go olu mánát vásihit ahte geavahuvvo beare unnán sámegiela iežaset mánáidgárdeárgabeaivvis. Sámegielat mánáide dat sáhttá mielddisbuktit giellaattrišuvnna. Giellaattrišuvdna máksá ahte mánáid ja ohppiid sámegiella ii ovdán nu movt livččii lunddolaš eatnigielagiidda. Sámi mánát geat galggaše oahppat sámegiela, hárve ohppet giela bures jus eai beasa doarvái vásihit giela. Gievrras giellamodeallaid ulbmil lea bargat systemáhtalaččat ja dihtomielalaččat sámegielgeavahemiin.
Gievrras giellamodeallaid definišuvnnas leat guokte oasi:
1) Organisatuvrralaš eavttut ja
2) Dihtomielalaš giellageavaheapmi.
Goappašat oasit gáibidit ahte eaiggádat ja jođiheaddjit aktiivvalaččat servet ovdánahttinbargui.
Suokkardallan:
- Maid dii diehtibehtet ovdalaččas gievrras giellamodeallaid birra?
- Maid háliidehpet olahit dáinna gealbopáhkain?
- Makkár lea gielladilli din báikegottis ja mánáidgárddis?
- Lea go din mánáidgárdi gearggus álggahit gievrras giellamodeallabarggu dán mánáidgárdejagi?
Gievrras giellamodeallat -namahusa lea dábálaš geavahit mánáidgárddi barggu oktavuođas. Skuvllas geavahuvvo maiddái namahus gievrras giellaoahpahusmodeallat. Muhtin oasit dán páhkas leat ráhkaduvvon oktasažžan sihke mánáidgárdái ja skuvlii, ja dan dihte geavahuvvojit dát namahusat seahkálagaid.