Servodahkii ávkin

Servodat bidjá olu ruđa sámegieloahpahussii. Jus oahpahus čađahuvvo geahnohis modeallaid bokte, de das ii leat ávki - mánát eai oahpa sámástit. Gievrras giellamodeallat baicca addet mihtolaš bohtosiid ja sihkkaraste ahte ruhtadeapmi duođai buvttada sámegielgelbbolašvuođa. Lea buorre servodatekonomiijii geavahit vugiid mat doibmet.

Lea maid dehálaš ahte lea oktasaš ipmárdus das maid guovttegielalašvuohta mearkkaša servodagas gos leat guokte giela main lea goabbatlágan stáhtus ja hui stuora erohus hubmiidlogus. Dilli lea goabbatlágan majoritehta- ja minoritehtagielaid gaskkas. Go sámi mánát galget šaddat guovttegielagin, de lea sámegiella dat giella mii lea rašes dilis, ja riikkagiella ohppet diehttelasat. Jus sámi mánát galget šaddat guovttegielagin, de ferte sámegiella leat guovddážis ja giella ferte deattuhuvvot vai lea balánsa gielaid gaskkas.

Mađi eanet marginaliserejuvvon sámegiella lea servodagas, dađi deháleappot lea ásahit ovttagielat sámi birrasiid, arenaid ja doaimmaid sihke mánáidgárddis, skuvllas ja astoáiggis. Jus ii, de dárogiella boahtá domineret eanas oasi mánáid ja nuoraid bajásšaddamis.
 

Gáldu: Pasanen, Annika & earát 2022: Gievrras giellamodeallat. Sámediggi.