Oamastanmodealla skuvllas

Skuvlla oktavuođas gohčoduvvo oamastanmodealla maiddai dievaslaš giellalávgumin. Dain oktavuođain sámástit buohkat nu bures go nákcejit, sihke oahppit ja oahpaheaddjit, ja sámegiella geavahuvvo sihke oahpahus- ja gulahallangiellan.  Dan sii dahket olles skuvlabeaivvi, buohkaiguin  ja buot báikin olles skuvllas. 

Ohppiid majoritehtagiella ovdána earet eará dárogiel ja eŋgelasgiel skuvlafágain, ja sii dárustit eanas áigge go eai leat skuvllas, jus sis lea dárogiella ruovttugiellan. Dainna lágiin oahppit šaddet máŋggagielagin go skuvla doaibma ovttagielat sámegielat arenan. Eŋgelasgiella maid oažžu olu saji astoáiggis, go olu dan digitála máilmmis lea eŋgelasgillii. Dat gávdnojit maid máŋggat eŋgelasgielat ja dárogielat oahpporesursa mat dorjot ohppiid majoritehtagiela ovdáneami. 

Jus skuvllas leat ohppiidjoavkkut mat čuvvot nannenmodealla, de sáhttá sehket  ohppiidjoavkkuid geat čuvvot nannenmodealla ja daid geat čuvvot oamastanmodealla, go dat oahppit geat čuvvot oamastanmodealla álget geavahit sámegiela gulahallangiellan.

Buot oahppit geat orrot sámegiel giellaovdánahttinsuohkaniin dahje giellaealáskahttinsuohkaniin lea riekti oažžut oahpahusa sámegielas ja sámegillii. Dát boahtá ovdán oahpahuslága § 3-2.  Dat mearkkaša ahte ohppiin sáhttá leat riekti oažžut oahpahusa buot fágain sámegillii, jus váhnemat dan gáibidit. 8.luohkkáceahki rájes sáhttet oahppit ieža gáibidit oažžut sihke buot oahpahusa sámegillii ja oahpahusa sámegielfágas. 
Jus 10 oahppi muhtin suohkanis olggobeale sámegiel giellahálddašanguovllu gáibidit oahpahusa sámegillii ja sámegielfágas, de lea sis riekti oažžut dán, ja joatkit oažžut dan nu guhká go unnimusat 6 oahppi čuvvot fálaldaga. 

 
Gáldut:

Pasanen, Annika, Baal, Berit Anne Bals, Mikkelsen, Inga Lill, Päiviö, Ánne-Marge (2022): Gievrras giellamodeallat, Sámediggi. 

Oahpahusláhka §3-2 https://lovdata.no/lov/2023-06-09-30/§3-2

Sameloven §3-1 https://lovdata.no/lov/1987-06-12-56/§3-1