Ohppiid iešguđetge gielladuogážat
Oahppit geain lea sámegiella ruovttugiellan, sii leat juo dávjá sátneriggát ja dovdet sámegiela giellastruktuvrra. Oahppit geain lea dárogiella ruovttugiellan lea dávjá dárogielsátneriggát ja dovdet dárogiela giellastruktuvrra. Goappaš dáin ohppiin lea dat giellamáhttu mii vurdo sudno ahkásaš mánáin, muhto dát máhttu lea goabbatge gielas. Danin leat sudnos goabbatge dárbbut, maiddai metodalaččat. Danin lea dehálaš juohkit ohppiid joavkkuide, iežaset gielladuogáža vuođul.
Dakkár rátkin sáhttá leat hearkkes fáddá. Muhtin váhnemat jurddášit go ná juhket ja rátket mánáid, de daid sirre A- ja B-joavkkuide. Muhto, dat ii leat dan birra sáhka. Vuosttažettiin de das lea sáhka njulget dáruiduhttinpolitihka váikkuhusaid, nu go giellamassima ja giellaattrišuvnna. Go juohká ohppiid joavkkuide, de lea ulbmil buoremusat heivehit giellafálaldaga ohppiidjovkui, vai olles ohppiidjoavku oažžu dan fálaldaga mii sidjiide lea buoremusat heivehuvvon. Dakkár juohkin lea njuovžileamos vuohki oažžut sámi mánáid ja ohppiid sámástit.
Go oahppit dan ohppiidjoavkkus guhte čuvvot oamastanmodealla lea ovdánan sámegiella dan muddui ahte nákcejit geavahit sámegiela gulahallangiellan ja aktiivvalaččat sámástit, de sáhttá sin sehkket ohppiidjoavkkuin geat čuvvot nannenmodealla.
Suokkardallangažaldagat:
- Movt sáhttibehtet juohkit ohppiidjoavkku, nu ahte dat oahppit geain lea sihke sámegiella ja dárogiella ruovttugiellan, ožžot sámegielfálaldaga mii lea heivehuvvon sin sámegieldássái?
- Movt sáhttibehtet organiseret ohppiidjoavkku nu ahte oahppit geat čuvvot oamastanmodealla eai beasa seahkanit daiguin geat čuvvot nannenmodealla?
- Makkár dain gielalaš doaimmain maid čađahehpet skuvllas sáhttá lágidit ovttas goappaš ohppiidjoavkkuiguin?
- Leatgo dis dan mađe bargit ahte lea vejolaš juohkit ohppiidjoavkku, vai leago dárbu eanet bargiide čađahandihte dán?