Mihttun sámegieloahpahusas ja fálaldagas lea ahte oahppit galget oahppat sámegiela ja šaddat produktiiva sámegielagiin. Oahppit leat produktiiva sámegielagat go lunddolaččat válljejit sámástit buot dilálašvuođain. Gievrras giellamodeallat, sihke oamastan- ja nannemodealla, leat dat beaktileamos vuogit olahit dán mihtu. Giellamodeallat leat reaiddut maid bokte giellaoahpahus oažžu čielga mihtuid, heivehuvvon metodaid ja dát váikkuhit dasa ahte organisatuvrralaš eavttut, diđolaš giellageavaheapmi ja ohppiid gielalaš bohtosat árvvoštallot. Buot dát bealit dahket ahte giellaoahpahus oažžu struktuvrra ja šaddá mearrediđolaš. Váldoerohus oamastan- ja nannenmodeallas lea ohppiid ruovttugiella. Dát giellamodeallat gáibideaba goabbatge metodaid maid vuođul bargá.
Dán gealbopáhkas beasat eanet lohkat movt bargat oamastanmodeallain, ja movt oamastanmodealla sáhttá doaibmat sihke dievaslaš giellalávgumiin ja oasseáigásaš giellalávgumiin.