Dál leat guokte gievrras giellaoahpahusmodealla mat leat anus muhtin sámi skuvllain ja sámi luohkáin, maid berre ovddidit viidáseappot buot sámi skuvllaide ja sámi luohkáide. Nubbi modealla lea nannenmodealla, mii adno ohppiide geain lea sámegiella ruovttugiellan, ja gulahallangiellan. Nubbi modealla fas lea oamastanmodealla, mii adno ohppiide geain lea dárogiella ruovttugiellan ja galget oahppat ja ovdánahttit sámegiela gulahallangiellan. Jus galgá lihkostuvvat sámegieloahpahusain, de fertejit skuvlla organisatuvrralaš bealit doaibmat ja obbalaš giellaplánat gávdnot, ja dát lea skuvlla eaiggádiid ja jođiheddjiid ovddasvástádus.
Gievrras giellaoahpahusmodeallaide lea dárbu, dan dihte go olu ohppiide oahpahuvvo sámegiella vugiin mii gohčoduvvo goaikkanasmodeallan. Das lea gaskamearálaččat 2–3 diimmu sámegieloahpahus vahkkus. Dát lea mielddisbuktán giellaattrišuvnna ohppiide geain lea sámegiella eatnigiellan. Giellaattrišuvdna máksá ahte mánáid ja ohppiid sámegiella ii ovdán nu movt livččii lunddolaš eatnigielagiidda. Goaikkanasmodealla dagaha ahte oahppit, geain lea sámegiella nubbingiellan, dávjá eai šatta produktiiva sámegielagin, ja sin sámegiella dávjá ii ovdán doarvái buori dássái.
Gievrras giellamodeallaid definišuvnnas leat guokte oasi:
1) Organisatuvrralaš eavttut
2) Dihtomielalaš giellageavaheapmi
Goappašat oasit gáibidit aktiiva searvama eaiggádiin ja jođiheddjiin.
Oanehis suokkardallan
- Maid dii ovdalaččas diehtibehtet gievrras giellaoahpahusmodeallaid birra?
- Maid háliidehpet olahit dáinna gelbbolašvuođaloktemiin?
- Makkár gielladilli lea din báikegottis ja ásahusas?
- Lea go din skuvla gearggus álggahit gievrras giellamodeallaid barggu dán skuvlajagi?
Gievrras giellamodeallat -namahusa lea dábálaš geavahit mánáidgárddi barggu oktavuođas. Skuvllas geavahuvvo maiddái namahus gievrras giellaoahpahusmodeallat. Muhtin oasit dán páhkas leat ráhkaduvvon oktasažžan sihke mánáidgárdái ja skuvlii, ja dan dihte geavahuvvojit dát namahusat seahkálagaid.